Abu Rayhon Beruniy nomidagi Urganch davlat universitetida yurisprudensiya yo‘nalishini rivojlantirish, zamonaviy huquqiy ta’limni tashkil etish, ilm-fan va amaliyot integratsiyasini ta’minlash hamda yuqori malakali, raqobatbardosh yuridik kadrlarni tayyorlash maqsadida universitet rektorining 2023-yil 30-avgustdagi 126-son buyrug‘i asosida Ijtimoiy-iqtisodiy fanlar fakulteti tarkibida Yurisprudensiya ta’lim yo‘nalishi tashkil etildi.
Mazkur ta’lim yo‘nalishi faoliyatini samarali yo‘lga qo‘yish, ta’lim jarayonini zamonaviy talablar asosida tashkil etish, o‘quv-uslubiy, ilmiy-tadqiqot va ma’naviy-ma’rifiy ishlarni tizimli amalga oshirish maqsadida alohida Huquq kafedrasi tashkil etildi. Kafedraga yuridik fanlari bo‘yicha falsafa doktori (PhD) Hajiyev Ulug‘bek Qo‘ziboyevich mudir etib tayinlandi.
Huquq kafedrasining asosiy maqsadi - Yangi O‘zbekiston taraqqiyot strategiyasi, Konstitutsiya va amaldagi qonunchilik talablaridan kelib chiqib, davlat va jamiyat ehtiyojlariga mos, yuksak huquqiy madaniyatga, zamonaviy bilim va ko‘nikmalarga ega, milliy va xalqaro huquq normalarini chuqur egallagan, amaliy faoliyatda mustaqil qaror qabul qila oladigan malakali yurist kadrlarni tayyorlashdan iborat.
Kafedraning o‘rta va uzoq muddatli rivojlanish rejalari quyidagilardan iborat:
«Yurisprudensiya» ta’lim yo‘nalishi bo‘yicha ta’lim sifatini xalqaro standartlar darajasiga olib chiqish;
- huquq sohasida magistratura hamda keyinchalik tayanch doktorantura (PhD) dasturlarini yo‘lga qo‘yish;
- respublika va xorijiy oliy ta’lim muassasalari bilan qo‘shma ta’lim dasturlari va akademik almashinuvlarni kengaytirish;
- zamonaviy Legal Tech, raqamli huquq, sun’iy intellekt huquqi, kiberxuquq, xalqaro tijorat huquqi kabi yangi fanlarni o‘quv jarayoniga bosqichma-bosqich joriy etish;
- huquqiy klinika faoliyatini tashkil etish va aholiga bepul huquqiy maslahat berish tizimini rivojlantirish;
- talabalarning xorijiy tillar va yuridik ingliz tili bo‘yicha kompetensiyalarini oshirish;
- Scopus va Web of Science bazalarida indekslanadigan nufuzli jurnallarda professor-o‘qituvchilarning ilmiy maqolalarini ko‘paytirish;
- davlat organlari, sud-huquq muassasalari va xususiy sektor bilan strategik hamkorlikni yanada mustahkamlash;
- raqamli ta’lim platformalari, elektron kutubxona va virtual huquqiy laboratoriyalarni rivojlantirish;
- respublikada huquqiy ta’lim va huquqiy tadqiqotlar bo‘yicha yetakchi ilmiy-ma’rifiy markazlardan biriga aylanish.
